Надоврзувајќи се на истражувањата за ставовите за воведување на родителите и на наставниците, специјалните едукатори и стручните служби што ги спроведовме во 2019 и 2020 година, најновото истражување за ставовите на наставниците за воведување на сеопфатното сексуално образование (ССО) во основното образование дава увид во тоа какви промени настанале кај наставниците по реализација на пилот-програмата за сеопфатно сексуално образование, како и по бројните дебати за и против воведување на ваков изборен предмет, кои со различен интензитет континуирано се водеа во јавноста, а особено на социјалните мрежи.
Најопштиот заклучок што произлезе од ова истражување е дека меѓу наставниците и вработените во стручните служби во основните училишта доминира афирмативен став кон потребата за воведување формална настава за сексуално образование, како и дека во периодот од почетоците на официјализацијата на идејата, до моментот на завршување на пилот-проектот, поддршката е во благ пад.
И додека малиот процент на опаѓање на вкупната поддршка во голема мера може да се припише на негативната пропаганда која во одредени периоди по актуализирање на Концепцијата за основното
образование добиваше и размери на вистинска демонизација на самата идеја, сепак истакнуваме дека значителен дел од опфатените наставници (вкупно 1652) би сакале да се вклучат во обука за реализација на овие содржини бидејќи сметаат дека информациите, ставовите и вештините што учениците би ги стекнале низ оваа настава се исклучително важни и релевантни.
Според нив, пречките за успешна реализација на програмата лежат најмногу во фактори надвор од училиштето, односно во неподготвеноста на заедницата или на родителите да прифатат систематска едукација на тинејџерите во сферата на сексуалноста.
Истражувањето е достапно на македонски и на албански јазик.
