ХЕРА – Асоцијација за здравствена едукација и истражување објавува повик за прибирање понуди од правни лица, за креирање и спроведување на позитивна кампања за искористување на економскиот потенцијал што го поседува ромската заедница од една страна, и сензибилизација на работодавачите за вработување на Роми.
Ангажманот е во рамки на проектот „Вработена Ромка = Независна Ромка”, поддржан од шведската фондација Квина тил Квина.
1. За проектот
1.1. Позадина на проектот
Вработувањето на социјално ранливите и исклучени граѓани сѐ уште претставува сериозен предизвик во Република Северна Македонија. Со невработеност, но и со тешкотии при барање на работа се соочуваат речиси сите невработени лица, а особено оние најранливите: младите, долгорочно невработените лица, корисници на гарантирана минимална помош, лица со низок степен на образование и др. Состојбата со Ромите, особено Ромките, како долгорочно невработени лица, останува еден од најзагрижувачките фактори што го попречуваат нивното целосно вклучување во општеството. Ниската стапка на вработеност кај Ромките и воопшто отсуството на оваа група на жени од пазарот на трудот, има корени во неколку области, како: ниското ниво на образование или воопшто немање образование; раните бракови и традиционалната улога на Ромката. Конечно, дискриминацијата на работното место е исто така пречка за жените Ромки да најдат и задржат добро платена работа со добри услови и игра огромна улога дури и во нивната демотивација да се активираат. Стапката на вработеност меѓу Ромите изнесува 23 %, што е приближно двојно под националниот просек. Алармантен е податокот за вработеност на Ромките – само 8 %, што укажува на големи предизвици и драстичен родов јаз. Истовремено, мора да се истакне дека околу 25 % од ромската заедница работи неформално: мажите најчесто се бават со трговија, такси-услуги, градежништво и земјоделство, а жените со трговија и хигиенски услуги. Недостигот од финансиски средства е најважната причина за непосетувањето градинка, основно и средно училиште. Покрај тоа, Ромките секојдневно наидуваат на голем број пречки при остварување на правото на здравствена и социјална заштита, грижата за сопственото репродуктивно здравје и пристапот до услуги во рамки на здравствените и социјалните установи. ХЕРА преку сервисите на Младинските центри овозможува пристап до подобри услуги за сексуалното и репродуктивното здравје, особено за Ромките и маргинализираните заедници.
Општа цел на проектот:
Да се подобрат можностите за вработување Ромки.
1.3. Специфични цели:
1.3.1 Да се зголеми учество на Ромките во активните мерки за вработување
1.3.2 Да се подигне свеста кај приватниот сектор и пошироката јавност за економскиот потенцијал што го поседуваат Ромките.
1.4. Целна група на проектот:
Ромки; приватен сектор, јавни институции, невладини организации кои работат на темите поврзани со женски прашања и инклузија на Роми, ромската заедница, јавноста.
2. Опис на активноста:
Целта на оваа активност е информирање и едукација на ромската заедница, со посебен фокус на Ромките за можностите за вработување преку користење на активните мерки за вработување и улогата на фокалните точки на терен. Кампањата треба да придонесе кон искористување на економскиот потенцијал кој го поседува ромската заедница и сензибилизација на работодавачите за да вработуваат Роми. Преку спроведувањето на кампањата треба да се зголеми вработувањето на Ромки во приватниот сектор, при што најмалку 70 Ромки да се вклучат и да ги користат мерките за вработување, и најмалку 10 од нив да се вработат.
Кандидатите треба да ги исполнуваат и следниве основни критериуми:
· Активна компанија која е формирана согласно Законите во Република Северна Македонија, и постои најмалку 2 години.
· Спроведени најмалку пет креативни проекти и реализација на позитивни кампањи;
· Докажано портфолио во изработка на исти/слични продукти и кампањи;
3. Задачи:
· Да соработува и да ги следи насоките за изработка и спроведување на кампањата од лицето назначено од ХЕРА
· Да изработи маркетинг план и визуелен идентитет на кампањата во согласност со насоките од проектниот тим
· Да го презентира маркетинг план и визуелен идентитет на кампањата пред нарачателот и да го модифицира во согласност со дадените насоки од тимот
· Да спроведе кампања во времетраење од три месеци со фокус на градовите: Скопје, Гостивар, Штип и Виница;
· Да ангажира/вклучи најмалку три бизнис личности и три личности од заедницата од Северна Македонија во кампања, изборот на јавните личности треба да биде во соработка со ХЕРА
Да изработи извештај за постигнатите резултати и да го достави до ХЕРА
4. Временска рамка:
Работата на оваа активност се очекува да биде спроведена во период април- октомври 2024 година.
5. Потребна документација за аплицирање
При аплицирањето, заинтересираните компании треба да достават:
1. Краток опис на компанијата
2. Портфолио со сработени кампањи за дигитални медиуми со посебен осврт на теми од животна средина, одржливи навики и сл.
3. Биографија од најмалку едно лице со искуство во изработка и спроведување на кампањи, односи со јавност, маркетинг и работа на социјални медиуми, кое би било ангжирано на активноста
4. Предлог концепт за медиумска кампања
5. Тековна состојба не постара од 6 месеци
6. Финансиска понуда по ставки
Целокупната документација треба да биде доставена на македонски јазик во електронска форма.
Предвид ќе бидат земени само оние понуди од правни лица кои ги исполнуваат условите и кои ќе испратат комплетна документација.
6. Евалуација на понудите:
ХЕРА, во согласност со одредбите од договорот на проектот, ќе спроведе јавен повик за прибирање на понуди.
Евалуационата комисија ќе ги извести само оној кандидат чија понуда ќе биде избрана.
Критериумите за избор ќе бидат оценувани на следниот начин:
· работно искуство – 30 поени
· референци – 30 поени
· предлог-кампања – 40 поени
Договор ќе биде склучен со онаа компанија која освоила најголем број бодови во сооднос квалитет на понуда и цена.
Пријавување
Комплетната понуда, апликантите треба да ја испратат на e-mail: konkurs@hera.org.mk најдоцна до 29 март 2024 г. 16:00 часот, со назнака предмет на пораката Понуда за ангажирање на правно лице за креирање и спроведување на позитивна кампања. Некомплетни понуди или понуди испратени по предвидениот рок нема да бидат земени во предвид.
Повеќе информации можете да добиете на тел. 02 3290 395 или на 076 447 702
Контакт лице: Оливера Стојковска Ивановска, Програмска асистентка