Родовата рамноправност и унапредувањето на положбата на жените во општеството претставува едно од основните начела на демократијата и општествениот поредок.
Меѓутоа, според Меѓународната организација на трудот, жените во светот се недоволно застапени во секој домен од социо-политичкиот живот, не се доволно застапени во парламентите и се далеку од сите нивоа на одлучување.
Ова е особено видливо кога станува збор за Ромките како една од најмаргинализираните групи на жени. Сакајќи да увидиме каква е ситуацијата кај нас на терен, во 2020 година спроведовме мониторинг на вработувањето на Ромките во овдешните државни институции, при што дојдовме до заклучок дека нивната застапеност не само што не е доволна, туку и дека има национални институции кои немаат ниту една вработена Ромка.
Притоа, истражувањето покажа дека вработувањето на Ромите е најголемо во министерствата во споредба со другите државни институции.
И покрај тоа што наодите од спроведениот мониторинг укажуваат дека во 2020 година се зголемил бројот на вработени Роми и Ромки, сепак неспорен е заклучокот дека начелото на соодветна и правична застапеност кај институциите не се почитува во целост.
Целосниот извештај од мониторингот на вработување Ромки во државните институции во земјава во 2020 година може да го прочитате тука.