По повод годинешните глобални „16 дена активизам против родово заснованото насилство“ се приклучивме кон кампањата #ResponsibleTogether23 на Европската мрежа за работа со сторители – бидејќи цврсто веруваме дека за да му ставиме крај на насилството, мора да работиме со оние коишто најчесто прибегнуваат кон него.
Токму преку програмите за работа со сторителите на насилство, мажите коишто прибегнале кон насилство не само што учат како ги препознаат штетните обрасци на однесување и да преземат одговорност за стореното, туку имаат и простор да развијат емпатија и да ги преиспитаат своите изговори и оправдувања.
Европската мрежа за работа со сторители на насилство се стреми да ја подобри безбедноста на жените и децата жртви на насилство преку промовирање ефективна работа со сторителите на насилство и родова еднаквост. Есенва станавме нејзина членка бидејќи преку нашиот Прв Семеен Центар – ПСЦ во Град Скопје работиме со сторители на насилство уште од 2013 година. До ден-денес, ова е единствената ваква програма во Македонија во рамките на граѓанскиот сектор.
