На 13-ти мај во Скопје како дел од промовирањето на новата глобална кампања „Јас одлучувам“ (I decide) беше одржан состанок со претставници на институциите, граѓанскиот сектор и меѓународните организации во нашата земја. Овој состанок имаше за цел да се престават глобалните процеси кои што се однесуваат на воспоставувањето на новата развојна рамка, односно новите цели за оддржлив развој.
Во изминатите 20 години, во светот и кај нас, преку спроведување на интервенции кои што произлегуваат од Програмата и акција на Меѓународната конференција за развој и население и Милениумските развојни цели, во различни области беше унапредено сексуалното и репродуктивното здравје и права. Сепак сите планирани цели не се постигнати и тие насочуваат кон идните планирање на светскиот развој.
На овој состанок преку дискусија беше заклучено дека (1) водени од искуството на планирањето и поставувањето на Милениумските развојни цели, овој процес на креирање на новата глобална развојна рамка е поинклузивен и отворен и таквите можности може и треба да се искористи, (2) овој процес исто така треба да биде искористен и за влијание на националните состојби, односно преку учество во консултативните процеси на глобално ниво да се постават обврски кои понатаму треба да бидат спроведени од националните власти, (3) на глобално ниво постои консензус дека човековите права мора да бидат гарантирани и да бидат основа за развојот во иднина и рамката за човекови права треба да биде искористена за новите планирања, (4) и покрај потребата од што поголемо вклучување и на граѓанскиот сектор во глобалните процеси не смее да се намали интензитетот на застапувањето за подобрување на состојбите на национално ниви, а тоа вклучува и обезбедување достапна модерна контрацепција, сеопфатно сексуално образование и пристап до услуги за безбеден абортус.
Кампањата „Јас одлучувам“ која во Македонија ја промовира ХЕРА, како организација членка на Меѓународната федерација за планирано родителство, има за цел да ги пренесе токму овие пораки и на глобално ниво. Оваа кампања која ќе се спроведува во наредните 18 месеци има единствена мисија да ја пренесе пораката дека сиромаштијата не може да биде надмината без унапредување на сексуалното и репродуктивното здравје.
За да ја подржите оваа кампањата потпишете ја петицијата, која во средината на 2015 ќе му биде предадена на Генералниот секретар на Обединетите нации, Бан Ки Мун.
