Здружение ХЕРА испрати жалба до Советот за етика во медиумите во Македонија (СЕММ) за прилогот со наслов „Сексуално образование на основците по терк на Хера, од каде доаѓа Царовска“, емитуван на 12 јуни 2021 година во вестите на телевизија „Алфа“, а објавен на веб-страницата на медиумот. Во жалбата поднесена до СЕММ се наведува дека оспорениот прилог содржи неточни и нефер известување, незастапена втора страна, говор на омраза, дискриминација, мешање на факти и мислење, вест и коментар, односно дека Кодексот на новинарите е прекршен во членовите 1, 10 и 13.
На седницата одржана на 28 јули 2021 година, Комисијата за жалби при Советот за етика во медиумите во Македонија утврди дека жалбата е ОСНОВАНА. Комисијата едногласно одлучи дека Кодексот на новинарите на Македонија е прекршен во членовите 1 и 3, а со мнозинство гласови и во членот 10.
Член 1: „Новинарот има право на слободен пристап до сите извори на информирање што се од јавен интерес. Новинарот треба да објавува точни, проверени информации и нема да прикрива суштински податоци и да фалсификува документи. Доколку информацијата не може да се потврди, или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно“.
Член 3: „Новинарот ќе настојува да биде обезбедено објавување на исправка, деманти и одговор во случај кога ќе биде утврдена неточност на информација“.
Член 10: „Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…).“
Став на Комисијата е дека новинарскиот производ е необјективен, не нуди целосно точни и проверени информации. Комисијата посочува дека авторот на текстот генерализира и од самиот прилог се добива впечаток дека сите основци ќе имаат задолжително сексуално образование, информација што целосно се коси со ставот на здружението „ХЕРА“, која појаснува дека, всушност, се работи за пилот – програма која ќе биде реализирана само во четири основни училишта во државата. Од Комисијата велат дека „Медиумот тоа морал експлицитно да го нагласи и даде јасни одговори – дали се работи за задолжителен или изборен предмет и кои ученици ќе бидат опфатени. Во исто време, ТВ „Алфа“ објавува непроверена информација и тврди дека токму прирачникот на „ХЕРА“ ќе служи како урнек за сексуалното образование, вест што е целосно демантирана од страна на здружението, кое појаснува дека нивниот прирачник воопшто нема да се користи во пилот – програмите, туку наставата ќе се одвива според посебни материјали, во согласност со стандардите на ОН. Вака објавените информации недвосмислено ја доведуваат во заблуда јавноста и ја дезинформираат. Ова уште повеќе што медиумот воопшто не се обидел да го консултира здружението „ХЕРА“, кое несомнено е главна засегната страна во прилогот и од кое требало да биде обезбеден став. На тој начин, ТВ „Алфа“ ќе дала многу појасна и пообјективна слика, а јавноста повеќе одговори на одредени прашања.“
ХЕРА ја поздравува одлуката на СЕММ и ја оценува како професионална, објективна и во рамки на етичкиот кодекс за медиумите. Ова е втора по ред одлука со која се утврдуваат сериозни прекршувања и недоследности на телевизија Алфа поврзани со објавата или демантот на организацијата на гореспоменатиов прилог. Имено, и Агенцијата за аудио и аудиовизуелни медиуми (АВМУ) констатира дека „медиумот не ги почитуваше доследно законските одредби, односно не го пренесе демантот на ХЕРА во целост, селективно изостави суштински делови”
Сметаме дека одлуките и на СЕММ и АВМУ ќе спречат во иднина медиумите да објавуваат необјективни, неточни и непроверени информации за темите од областа на сексуалното и репродуктивно здравје и права, вклучително и сеопфатното сексуалното образование.
Целата содржина на одлуката на Комисијата за жалби при СЕММ може да ја прочитате тука.