Në një shtet laik, mendimi i Kishës është i parëndësishëm në krijimin e politikave për barazinë gjinore.
Platforma për barazi gjinore i kundërshton ashpër veprimet e Kishës Ortodokse Maqedonase kundër miratimit të Ligjit për barazi gjinore dhe futjes së edukimit seksual gjithëpërfshirës në shkolla.
Në tribunën e organizuar në Strumicë më 17 mars 2023, për të cilin raportuan disa media, peshkopi Jakov Stobiski bën komplot kundër miratimit të Ligjit për barazi gjinore dhe kundër futjes së edukimit gjithëpërfshirës seksual. Ky veprim i kishës është kundër grave, antihumanist dhe antikushtetues sepse paraqet ndërhyrje të fesë në miratimin e ligjeve. Me këtë lloj veprimi e sulmon rendin kushtetues sipas të cilit Maqedonia e Veriut është shtet laik, që do të thotë se KOM-i apo ndonjë organizatë tjetër fetare nuk duhet të përfshihet në formimin e ligjeve dhe politikave që nuk e rregullojnë funksionimin e bashkësive fetare.
Me këtë veprim KOM-i është afirmuar edhe më shumë si një organizatë që përhap mizogjininë dhe avokon për ruajtjen dhe riafirmimin e rolit vartës të gruas në shoqëri. Peshkopi shkon aq larg sa sfidon vetë termin barazi gjinore! Prandaj, konkluzioni logjikisht del se sipas kishës, burrat dhe gratë nuk janë të barabartë, ndaj nuk duhet të miratohen ligje që garantojnë barazinë e tyre.
Ideja se gratë dhe burrat nuk janë të barabartë është në themel të pretendimit se lufta për barazi gjinore është një imponim i ideologjisë, sesa një e drejtë natyrore dhe e garantuar me kushtetutë e çdo personi. Ideja se gjinia dhe seksi janë binare dhe se, si rrjedhojë, njerëzit i përkasin vetëm njërës apo tjetrës kategori (mashkull apo femër), është baza mbi të cilën ideja e pabarazisë gjinore, e kundërta diametrike e burrave dhe grave, dhe të rolit qendror të burrit në shoqëri – në krahasim me rolin ndihmës të gruas që definohet përmes funksionit riprodhues.
Kisha nuk e bën këtë pa interes! Afirmimi dhe ruajtja e vlerave shoviniste, sipas të cilave gratë varen nga burrat, i lejon Kishës të konsolidojë fuqinë e saj politike dhe ekonomike, duke përhapur dogma fetare, duke manipuluar frikën e njerëzve dhe duke kontrolluar diskursin politik. Paralajmërojmë se ky veprim i KOM-it është shqetësues dhe i rrezikshëm për mbarë shoqërinë. Njerëzimit iu deshën shekuj për t’u çliruar nga pushteti politik i klerit që sundonte përmes dhunës dhe korrupsionit, duke rritur në qiell pasurinë e udhëheqësve të kishës, duke ruajtur pushtetin përmes dogmave dhe duke persekutuar kundërshtarët. Kur Kisha merr mbi vete të drejtën për të ndërhyrë në procesin e vendimmarrjes për miratimin e ligjeve, do të thotë gjithmonë të avokojë zgjidhje që do t’i sjellin më shumë fuqi, kundër interesave të qytetarëve për ndërtimin e shoqërive në të cilat respektohet barazia dhe drejtësia sociale. Përdorimi i fesë për të rrënjosur dhe ruajtur privilegjin dhe pushtetin politik përbën fundamentalizëm fetar. Liria e fesë nuk është liri për veprim fundamentalist! Fundamentalizmi fetar kundër barazisë gjinore në një shoqëri demokratike duhet të frenohet në mënyrë që të garantohen të drejtat e të gjithë qytetarëve. Gratë, burrat, transgjinorët, njerëzit me identitete të ndryshme gjinore nuk janë ideologji, por njerëz të drejtat e të cilëve duhet të garantohen dhe mbrohen siç duhet.
Platforma për Barazi Gjinore e dënon ashpër performancën e Venko Andonovskit, pjesëmarrja e të cilit ishte padyshim në rolin e besimtarit, e jo të një profesori universitar që nuk ka ekspertizë në fushën e barazisë gjinore! Kjo nuk e ndaloi atë që të angazhohej në përhapjen e mizogjinisë, etiketimin dhe përhapjen e propagandës. E dënojmë ashpër pjesëmarrjen e përfaqësuesve të zgjedhur në vetëqeverisjen lokale dhe në Këshillin e Qytetit të Strumicës, të cilën e vlerësojmë si skandaloze, sepse me praninë e tyre i dhanë legjitimitet forumit si bazë për linçimin e aktivisteve dhe disidentëve dhe për nxitjen e urrejtjes, me çka kërcënohet jo vetëm privatësia personale, por edhe siguria dhe integriteti i organizatave të shoqërisë civile që punojnë për promovimin e barazisë gjinore dhe demokratizimin e shtetit në procesin e anëtarësimit në BE. Nga njëra anë, qeveria qendrore e udhëhequr nga LSDM-ja është zotuar të punojë në promovimin dhe avancimin e barazisë gjinore dhe ta afrojë vendin me standardet e BE-së, dhe nga ana tjetër pushteti lokal në Strumicë, i udhëhequr nga e njëjta parti, merr pjesë në organizimin e ngjarjeve ku ndodhin linçime të aktivisteve dhe organizatave për barazi gjinore dhe përhapin informacione të rreme.
Lëvizja feministe në Maqedoninë e Veriut, gratë dhe organizatat e grave kanë vite që avokojnë për miratimin e legjislacionit që do të mundësojë vendosjen e barazisë gjinore thelbësore, në të cilën duhet të kontribuojë Projektligji për barazi gjinore. Futja e edukimit gjithëpërfshirës seksual të bazuar në parimet e të drejtave të njeriut, shkencës së bazuar në fakte, gjithëpërfshirjes dhe mosdiskriminimit, ndër të tjera, është gjithashtu një masë për arritjen e barazisë gjinore që duhet diskutuar me fëmijët dhe të rinjtë në vitet më të hershme të edukimin e tyre.
I mirëpresim përpjekjet e Ministrisë së Punës dhe Politikës Sociale, si dhe të bashkësisë ndërkombëtare, duke përfshirë OSBE-në, Delegacionin e BE-së dhe agjencitë e OKB-së që janë avokatë për miratimin e Ligjit për barazi gjinore. Kërkojmë që Ligji për barazinë gjinore të miratohet në një kohë sa më të shkurtër, me mbështetjen e deputetëve të të gjitha partive politike, me çka do të arrihet një konsensus i gjerë politik për përmirësimin e barazisë dhe lirive individuale të njeriut.
Anëtare të Platformës:
- Tiiiit! Inc.
- Lufto si femër
- Iniciativa Qytetare Femërore ANTIKO
- Shoqata Forumi i Gruas
- Shoqata për Barazi të Barabarta Semper
- Shoqata për Zhvillim Rural Lokal
- Shoqata për Mbështetje të Punëtorëve të Margjinalizuar STAR-STAR Shkup
- Shoqata për Avancimin e barazisë Gjinore Aksioni Zdruzhenska
- Shoqata për Emancipim, Solidaritet dhe Barazi të Grave – ESE
- Shoqata për Zhvillim Edukativ EKVALIS
- Instituti për Shkenca Shoqërore dhe Humaniste
- Koalicioni Margjinat
- LezFem
- Rrjeti për Mbrojtje nga Diskriminimi
- Rrjeti Kombëtar kundër Dhunës mbi Gratë dhe Dhunën Familjare
- Këshilli Kombëtar për barazi Gjinore
- Organizata e Grave të Qytetit të Shkupit (OGSH)
- Organizata e Grave të Komunës së Sveti Nikoles
- Organizata e Grave “Kumanovka”
- Reaktor – Hulumtim në Veprim
- Koalicioni Rural
- Stela
- TAKT
- Komiteti i Helsinkit për të Drejtat e Njeriut
- HERA
- HOPS – Opsione për Jetë të Shëndetshme Shkup
- Shoqata Humanitare “Nëna”
Qendra për Hulumtim dhe Krijimin e Politikave (QHKP)
