Почитувани, ХЕРА – Асоцијација за здравствена едукација и истражување чувствува должност, во името на репродуктивната слобода на жените и девојките во Македонија, да реагира во врска со интервјуто со Никола Маџиров, објавено на ResPublica, блог на Институтот за комуникациски студии, на 9 декември 2021 година со наслов „Македонскиот јазик преживеа повеќе абортуси и секој обид за негово убивање ќе мора да вклучува сокривање на трупот“.
Независно што во насловот, всушност, се цитира поетот Маџиров, сметаме дека да се одбере токму овој дел од сите одговори во интервјуто – за што, пред сѐ, одлучува уредникот – е понижувачко за сите девојки и жени во Македонија, особено ако се земат предвид блиското минато во кое се водеа скапи национални кампањи против репродуктивната слобода на граѓаните и, како што вели и самиот Маџиров, „наследените социјални норми“.
Разочарува фактот што современ автор како Маџиров успеал – независно од појдовната намера – да го парафразира носечкиот слоган на штетните владини кампањи и дискурси по 2013 година, но уште повеќе разочарува тоа што заради поголема читаност, вие како медиум го истакнувате токму оној дел којшто го претставува абортусот како недозволен чин, како нешто што треба да сокрива и таи.
Во време кога низ Европа и светот косат политиките кои им го отежнуваат или сосема оневозможуваат пристапот на жените и девојките до безбеден абортус, сметаме дека е неодговорно да пласирате ваков наратив – затоа што, верувале или не, токму ваквите политики одземаат животи. Оттука, со жалење констатираме дека воопшто не е далеку од вистината изјавата на Маџиров дека „поезијата, за жал, честопати била во служба на деструктивните нагони на темните фигури на човековата историја“.
Уште позагрижувачки е што и покрај „океанската непрегледност на информациите и делата“, ова интервју за огромен број на луѓе бил „островот на кој застанале да одморат пред да продолжат со ‘крстосувањето‘“. Иако повеќето од нив го поврзуваат текстот со одумирањето на македонскиот идентитет и јазик, сепак сметаме дека е крајно неодговорно како метафора да се истакнува абортусот кој инаку претставува есенцијална здравствена услуга. Згора на тоа, е и бесчувствително затоа што како и секоја бременост, така и секој абортус е приказна сама за себе.
Маџиров вели: „Сè е во движење: јазикот се менува, музејските клучеви ʼрѓосуваат, бојните полиња стануваат археолошки наоѓалишта…“. Нешто што не би смееле да дозволиме да се менува на полошо е репродуктивната слобода на жените: репродуктивните права се човекови права, а без жени кои самостојно ќе одлучуваат за своето здравје и живот, ниту едно општество не може да оди напред.
Оттука, имајќи го предвид влијанието што медиумите го имаат врз јавното мислење, апелираме за повнимателно насловување на написите затоа што само така може да им се пркоси на стигмата, предрасудите и осудата насочени кон сите оние жени кои направиле абортус или кои ќе направат во иднина за да ги сочуваат своето здравје и живот.
