Gratë dhe vajzat në periudhën riprodhuese nga këto rajone, ndërsa gratë me aftësi të kufizuara, gratë rome dhe gratë nga mjediset rurale do të mund të bëjnë PAP test falas dhe të marrin kontracepsion dhe shërbime të tjera për shëndetin seksual dhe riprodhues.
Sot, HERA – Asociacioni për edukim shëndetësor dhe hulumtim dhe Qendra për mjekësi familjare, në zyrat e Shtëpisë së shëndetit në Makedonski Brod, zyrtarisht e shënuan hapjen e ordinancës gjinekologjike me çka njëkohësisht e shënuan edhe fillimin e punës edhe të 3 ordinancave gjinekologjike në shtëpitë e shëndetit në Resnjë, Radovish dhe Dellçevë. Në këtë mënyrë, në këto rajone shëndetësore përmirësohet ndjeshëm shëndeti seksual dhe riprodhues i mbi 20.600 grave dhe vajzave të moshës 15 deri në 49 vjeç, të cilat sipas hartës së mëparshme kanë pasur qasje vetëm te 4 mjekë gjinekologë familjarë.
Në hapje mori pjesë ambasadori i Japonisë në Republikën e Maqedonisë së Veriut, z. Savada Hironori, kryetari i Komunës së Makedonski Brodit, z. Zharko Risteski, drejtori i Shtëpisë së shëndetit në Makedonski Brod, z. Zharko Simeski, drejtoresha programore e HERA Elizabeta Bozhinoska dhe Dr. Katarina Stavriq nga Qendra për mjekësi familjare. Pajisjet e 4 klinikave gjinekologjike janë në bashkëpunim ndërmjet HERA dhe Qendrës për mjekësi familjare në Fakultetin e Mjekësisë nga Shkupi, me mbështetje financiare nga Fondi Japonez i mirëbesimit të Federatës Ndërkombëtare të Planifikimit Prindëror, mbështetur nga qeveria japoneze dhe populli japonez.
Klinikat disponojnë me kontracepsion falas (prezervativë, kontracepsion oral dhe kontracepsion urgjent), broshura edukative, si dhe analiza për marrjen e briseve vagjinale për infeksionet seksualisht të transmetueshme dhe PAP testin. Ato janë të vendosura brenda shtëpive të shëndetit për të lehtësuar qasjen në shërbimet gjinekologjike dhe planifikimin familjar për gratë në këto qytete. Ato para së gjithash janë të destinuara për mjekët familjar të cilët kanë kryer trajnime të duhura teorike dhe praktike të organizuara nga Qendra për mjekësi familjare dhe Klinika Universitare për Gjinekologji dhe Obstetrikë, por do të mund të përdoren edhe nga gjinekologë të nivelit të mesëm ose terciar të cilët në ditë të caktuara të javës do të mund të vijnë në shtëpitë e shëndetit dhe të ofrojnë shërbime shtesë të specializuara.
Synimi është që pajisjet të mbeten në përdorim të shëndetit publik dhe të gjithë mjekët e interesuar të familjes dhe gjinekologët të mund t’i përdorin pa pagesë në të ardhmen. Përfshirja e mjekëve familjar si ofrues kompetentë të shërbimeve të shëndetit riprodhues është parashikuar nga reforma për kujdesin primar shëndetësor nga viti 2019, për të cilën HERA dhe Qendra për mjekësi familjare, së bashku me Ministrinë e Shëndetësisë dhe Fondin për sigurim shëndetësor, me mbështetjen nga Qeveria japoneze dhe populli japonez po përgatisin edhe Planin kombëtar, ndërsa kanë përgatitur edhe plan programin për mjekët familjar dhe janë kryer trajnime teorike dhe praktike nga gjinekologë klinikë për 24 mjekë familjarë nga 10 rajonet shëndetësore të Maqedonisë.
Në këtë mënyrë, nëpërmjet edukimit dhe akreditimit të mëtejshëm të profesionistëve, por edhe sigurimit të pajisjeve dhe materialeve të përshtatshme, protokolleve për zbatimin e shërbimeve në nivel primar dhe stimulimit financiar, numri i ofruesve të shërbimeve gjinekologjike, përfshirë edhe mjekët familjar, të cilët janë kyç për kujdesin riprodhues të grave. Rritja e disponueshmërisë dhe aksesit në shërbimet cilësore parandaluese për shëndetin seksual dhe riprodhues në nivelin primar të kujdesit shëndetësor do të nënkuptojë shëndet më të mirë për gratë dhe vajzat, por edhe një barrë më të ulët për sistemin shëndetësor, i cili investon shumë më tepër burime njerëzore dhe financiare sa herë që parandalimi dështon.
Ky event është pjesë e projektit “Mjekët e familjes partnerë në zgjerimin e aksesit dhe zgjedhjes për kontracepsionin dhe shërbimet për shëndetin seksual dhe riprodhues”, i cili zbatohet në partneritet ndërmjet HERA – Asociacionit për edukim shëndetësor dhe Hulumtim dhe Qendrës për mjekësi familjare pranë Fakultetit të Mjekësisë nga Shkupi, me mbështetjen e Ministrisë së Shëndetësisë, Fondit për sigurim shëndetësor dhe mbështetje financiare nga Qeveria japoneze (Japan Trust Fund).
