Феминистичката антифашистичка мрежа – ФАМа [1] изразува револт поради пресудата на Апелациониот суд за прекршоци во Белград со која се потврдува паричната казна за активистката Аида Чоровиќ, која со своето дејствување подолго од две децении повикува на соочување со минатото како предуслов за закрепнување на општеството, но и за воспоставување соработка меѓу државите од поранешна Југославија без товарот на минатото.
Оваа пресуда ја вознемирува демократската јавност како во Србија, така и во другите постјугословенски земји бидејќи испраќа јасна порака дека изразувањето на критички ставови не се толерира, туку остро се санкционира. Исто така, јасно покажува колку е длабок и тежок јазот меѓу европските стандарди и судската пракса во Србија кога е во прашање почитувањето на правата на мирно собирање и на слободно изразување политички ставови.
Паричната казна се изрекува бидејќи на 9 декември 2021 година активистките Аида Чоровиќ и Јелена Јачимовиќ фрлиле неколку јајца врз мурал со ликот на осудениот воен злосторник Ратко Младиќ, на аголот на улиците „Његошка“ и „Алекса Ненадовиќ“ во Белград, по што локалната полиција го забрани отстранување на муралот, акција што претходно ја најави Иницијативата на млади за човекови права.
Со осудувањето на Аида Чоровиќ за ненасилниот чин на изразување политички став, судот излезе од зоната на објективноста и непристрасноста и застана на страната на оние коишто ги релативизираат, оправдуваат и афирмираат воените злосторства и нивните сторители.
Залагајќи се за слободата на изразување и правото на мирно собирање, ФАМа ќе се обрати до меѓународните организации во чиј фокус е заштитата на бранителите и бранителките на човековите права.
Непоколебливо ја поддржуваме нашата соборка и нејзината одлука да му се спротивстави на величањето на воениот злосторник Ратко Младиќ, а со тоа и на одржувањето на атмосфера на конфликт, закани и ѕвечкање со оружје во нашиот регион.
[1] ФАМа е феминистичка антифашистичка мрежа која настана како резултат на размената на идеи за време на одбележувањето на 80-годишнината од основањето на Антифашистичкиот фронт на жените на Југославија во декември 2022 година во Босански Петровац и Бихаќ. ФАМА се ПОТПИРА на интернационалното наследство на АФЖ и има за цел да го зајакне феминистичкиот фронт на постјугословенскиот простор и да создаде цврст отпор против растечките екстремистички и профашистички сили чија мета се активисти и активистки, новинари и новинарки, уметници и сите оние кои слободно мислат и зборуваат.
